नेपाली क्रिकेट टिमलाई २० लाख रुपैयाँ दिने नोवेल मेडिकल कलेजकाे घोषणा

समाचार

गृहपृष्ठ
समाचार

नेपाली क्रिकेट टिमलाई पुरस्कार नेपाली क्रिकेट टिमलाई २० लाख रुपैयाँ दिने नोवेल मेडिकल कलेजकाे घोषणा

ईडीयू सवाल शुक्रबार, कात्तिक १७, २०८०

काठमाडौँ - नोवेल मेडिकल कलेज विराटनगरले विश्वकपमा छनौट भएकाे नेपाली क्रिकेट टिमलाई २० लाख रुपैयाँ दिने घोषणा गरेको छ। कलेजले पुरस्कारले खेलाडि र टिमको हौसला बढाउने भन्दै विश्वकपमा छनाेट भएकाेमा १५ लाख र आइतबार हुने फाइनल खेल जितेमा थप पाँच लाख गरि २० लाख रुपैयाँ दिने घोषणा गरेको हाे।

शुक्रबार काठमाडौँको मूलपानी मैदानमा भएकाे संयुक्त अरब इमिरेट्स (युएई) र नेपाल बीचकाे सेमिफाइनल खेलमा युएईलाई ८ विकेटले हराउँदै नेपाल सन् २०२४ को जुनमा अमेरिका र वेष्ट इन्डिजमा हुने टी - २० विश्वकपमा छनोट भएको हो ।

मूलपानी मैदानमा युएईले दिएको १३५ रनको लक्ष्य पछ्याउने क्रममा नेपालका आशिफ शेखले सर्वाधिक ६३ रन बनाए । त्यस्तै कप्तान रोहित पौडेलले ३५, गुल्सन झाले २२, कुशल भुर्तेलले ११ रन जोडेसँगै नेपाल विजयी भएकाे हाे।

पहिले ब्याटिङ गरेको युएईलाई मध्यम स्कोरमा रोक्न नेपालका कुशल मल्लले महत्वपूर्ण ३ विकेट लिएका थिए । ३ ओभर बलिङ गरेका उनले ११ रन खर्चेर ३ विकेट लिएका थिए । त्यस्तै सन्दीप लामिछानेले २, सोमपाल कामी र रोहित पौडेलले १/१ विकेट लिएका थिए ।

काठमाडौँमा जारी टी-२० विश्वकप छनौटमा आठ देश सहभागी छन्। फाइनलमा नेपाल र ओमन भिड्दैछन्। आईसीसी मेन्स टी-२० विश्वकप २०२४ मा कुल २० टिमले प्रतिस्पर्धा गर्नेछन् । यसअघि नेपालले सन् २०१४ मा बंगलादेशमा भएको टी-२० विश्वकप खेलेको थियो ।

प्रकाशित मिति: शुक्रबार, कात्तिक १७, २०८० १९:३८