काठमाडाैँ- शिक्षा विज्ञान तथा प्रविधि मन्त्रालयले संघीय शिक्षासम्बन्धी विधेयकलाई परिमार्जन गरी ‘विद्यालय शिक्षा विधेयक’ चाँडै संघीय संसद्मा प्रस्तुत गर्ने जनाएकाे छ। मन्त्रालयले परिमार्जित उक्त विधेयक अघि बढाउन लागिएको जनाएकाे हाे।
शिक्षा, विज्ञान तथा प्रविधि मन्त्रालयका प्रवक्ता दीपक शर्माले उक्त विधेयक गत असारको पहिलो सातादेखि मन्त्रिपरिषद्को विधेयक समितिमा विचाराधीन अवस्थामा रहेकाे र यसलाई सरकारले अघि बढाउने तयारी गरेकाे बताए।
प्रधानमन्त्री पुष्पकमल दाहाल ‘प्रचण्ड’ ले समाजवादी मोर्चामा आबद्ध दलनिकट विद्यार्थी संगठनका पदाधिकारीसँग आइतबार सो विधेयक यही साउन १६ गते संसद्मा पुग्ने बताएका थिए।
प्रधानमन्त्रीको उक्त जानकारीपछि विधेयकबारे शिक्षा क्षेत्रमा थप चासो बढेको छ तर मन्त्रालयले भने विधेयकको मस्यौदा सार्वजनिक गरेको छैन। प्रवक्ता शर्माले मन्त्रिपरिषद्मा पेस भइसकेपछि के के संशोधन भयो भन्ने आफूहरूलाई थाहा भइनसकेकाले विधेयकबारे विस्तृतमा भन्न नसकिने बताए।
नेपालको संविधान जारी भएपछि संघीय शिक्षा ऐनको आवश्यकता बोध भए पनि पटकपटक मस्यौदा बन्दै मन्त्रिपरिषद्सम्म पुगेर पुनः शून्यमा पुगी हाल नयाँ मस्यौदा तयार भएको हो।
सो विधेयकमाथि स्थानीय तह, शिक्षक, निजी विद्यालय सञ्चालक, विद्यालय कर्मचारी, बालविकास शिक्षकलगायतकाे चासो रहेको छ। प्रतिनिधिसभाको शिक्षा, स्वास्थ्य तथा सूचना प्रविधि समितिको बैठकमा सांसदहरूले उक्त विधेयक ल्याउन ढिलाइ नगर्न ध्यानाकर्षण गराएका छन्।
बैठकमा शिक्षा, विज्ञान तथा प्रविधिमन्त्री अशोककुमार राईले मन्त्रिपरिषद्को विषयगत समितिमा विधेयक विचाराधीन रहेकाले चाँडै सदनमा पुग्ने जानकारी दिए। प्रवक्ता शर्माले आफूहरुले विभिन्न सरोकार भएकाहरुसँगको सहमति र परामर्शमा भएका विषयवस्तुलाई सकेसम्म सम्बोधन गर्नेे प्रयास गरेको बताए।
