काठमाडाैँ - आन्दोलनरत शिक्षक महासंघ र सरकारबीच आज शुक्रबार वार्ता हुने भएको छ। सरकारको तर्फबाट शिक्षा, विज्ञान तथा प्रविधि मन्त्री रघुजी पन्त र मन्त्रालयको तर्फबाट शिक्षा सचिव दिपक काफ्लेले महासंघलाई आज नै वार्तामा बोलाएको थियो।
शिक्षा मन्त्रालय स्रोतका अनुसार वार्ता ४ बजे हुने भएकाे छ। सरकारको तर्फबाट वार्ताको नेतृत्व शिक्षामन्त्री पन्तले नै गर्ने भएका छन्। सरकारको तर्फबाट वार्ता कमिटी नबनेकाे र मन्त्री पन्तले नै वार्ताको नेतृत्व गर्ने मन्त्रालयले जनाएकाे छ।
सरकारले वार्तामा बोलाएपछि शिक्षक महासंघका नेताहरू आन्तरिक छलफलमा जुटेका छन्। ‘नवनियुक्त मन्त्रीज्यूले बोलाउनु भएको छ। एकछिनमा हामी मन्त्रालयमा जान्छौँ,’ महासंघको सहअध्यक्ष नानुमाया पराजुलीले भनिन्। तर उनले यसलाई वार्ता भन्न चाहिनन्। नवनियुक्त मन्त्रीले बोलाएकाले जान लागेको उनले बताइन्।
आजै शिक्षा मन्त्री पन्तले शिक्षकहरूलाई लचिलो भएर वार्तामा आउन आग्रह पनि गरेका थिए। संसद भवन परिसमा पत्रकारसँग उनले कानुन र बजेटले भ्याउनेसम्मको माग पूरा गर्ने बताएका छन्।
‘सरकार वार्ता र संवादको माध्यमबाट अहिले देखिएको समस्या समाधान गर्न प्रतिबद्ध छ। शिक्षक साथीहरूलाई लचिलो भएर आउन आग्रह गर्दछु,’ उनले भने, ‘ऐन कानुनको सिमा र बजेटले धान्ने सिमाभित्र रहेर समाधान खोज्न तयार छौँ।’
यसअघि बिहीबार सर्वोच्च अदालतले शिक्षकको माग तीन दिन भित्र सम्बोधन गरेर पठनपाठनको वातवरण बनाउन सरकारलाई आदेश दिएको थियो। शिक्षकहरू गत चैत २० गतेबाट निरन्तर सडक आन्दोलनमा छन्।
