शिक्षकहरूलाई आन्दोलन जारी राख्न माओवादी केन्द्रका अध्यक्ष प्रचण्डको अपिल

समाचार

गृहपृष्ठ
समाचार

शिक्षकहरूलाई आन्दोलन जारी राख्न माओवादी केन्द्रका अध्यक्ष प्रचण्डको अपिल

ईडीयू सवाल मंगलबार, वैशाख ९, २०८२

काठमाडौँ - नेकपा माओवादी केन्द्रका अध्यक्ष पुष्पकमल दाहाल प्रचण्डले आन्दोलनलाई निरन्तरता दिन शिक्षकहरूलाई अपिल गरेका छन्। नेपाल कम्युनिस्ट पार्टीको ७७ औँ स्थापना दिवस पार्टी केन्द्रीय कार्यालय पेरिसडाँडामा आयोजित कार्यक्रमलाई सम्बोधन गर्दै उनले यस्तो बताएका हुन्।

विद्यालय शिक्षा ऐनको माग गर्दै शिक्षकहरू गत चैत २० गतेदेखि काठमाडौँको सडकमा आन्दोलन गरिरहेका छन्। पटकपटक सरकारसँग वार्ता गरे पनि सफल हुन सकेको छैन। पूर्वप्रधानमन्त्री समेत रहेका प्रचण्डले भने शिक्षकहरूले पटकपटक वार्ता गरेर पनि असफल भएको भन्दै यो पटक धैर्यतापूर्वक आन्दोलन जारी राख्न अपिल गरेका हुन्।

‘शिक्षक साथिहरूलाई धैर्यतापूर्वक आन्दोलनलाई निरन्तरता दिन पनि अपिल गर्न चाहन्छु। तपाईंहरूले पटक पटक आन्दोलन गर्नुभएको, पटकपटक सम्झौता गर्नुभएको छ र पटकपटक धोका भएको छ,’ प्रचण्डले भने, ‘यो पटक त्यो स्थिति हुन नदिने जिम्मेवारी हामी सबैको छ। शिक्षकहरूको अझै धेरै छ।’

उनले एमालेकै नेतृ विद्या भट्टराईले पदबाट राजीनामा दिएको विषयले सरकार गैरजिम्मेवार रहेको अर्को प्रमाण भएको पनि बताए।

‘अझ हिजो अर्को एउटा घटना घट्यो। एमालेकै शिक्षामन्त्री विद्या भट्टराईले राजीनामा दिनुभयो। यसबाट पनि सरकार कति धेरै गैर जिम्मेवार छ भन्ने कुराको नयाँ प्रमाण प्रस्तुत भएको छ,’ प्रचण्डले भने, ‘यो सरकार आफ्नै बोझ थाम्नसक्ने वाला छैन। आफ्नै बोझमा दबिएर यो सकिन्छ। हामी चाहन्छौँ कि सरकारले अझै पनि बुद्धि पुर्‍याओस्।’

शिक्षकहरूले गरेको माग नयाँ नभएको भन्दै सम्झौता अनुसार अघि बढ्न प्रधानमन्त्री केपी शर्मा ओली नकारात्मक भएको जिकिर गरे।

‘शिक्षकहरूले माग गरेको कुनै नयाँ कुरा होइन। हिजो सरकारले गरेको सहमति कार्यान्वयन गर भनेको भन्दा बाहेक केही होइन,’ प्रचण्डले भने, ‘हिजो जे सम्झौता भएको थियो, त्यो सम्झौता अनुसार ऐन बनाइदेउ भनेको मात्रै हो। तर, त्यसमा प्रधानमन्त्री असाध्यै नकारात्मक भइदिएपछि के हुन्छ।’

प्रकाशित मिति: मंगलबार, वैशाख ९, २०८२ १४:४४