काठमाडाैँ - बुटवल लुम्बिनीमा अन्तर्राष्ट्रिय उपकुलपति र १८ औँ न्यूज (पूर्व, पश्चिम, उत्तर, दक्षिण) सम्मेलन हुने भएको छ। चौथो औद्योगिक क्रान्तिका लागि मानव संसाधनको विकास र उच्च शिक्षासम्बन्धी विश्वव्यापी संवादलाई प्रवर्द्धनका लागि लुम्बिनी बौद्ध विश्वविद्यालयको आयोजना, विश्वविद्यालय अनुदान आयोगको सहयोग र ग्लोबल युनिभर्सिटी नेटवर्कको सहकार्यमा बुधबार र बिहीबार उक्त सम्मेलन हुन लागेको हो।
उच्च शिक्षामा बौद्ध दर्शन अन्तर्राष्ट्रियकरण, प्राज्ञिक नेतृत्वमा बौद्ध दर्शन र नैतिकता, चौथो औद्योगिक क्रान्तिमा उच्च शिक्षाको अन्तर्राष्ट्रियकरण, नेपालको उच्च शिक्षाका चुनौती र अवसर विषयमा केन्द्रीत रहेर उपकुलपति सम्मेलन हुने लुम्बिनी बौद्ध विश्वविद्यालयका उपकुलपति प्रा. सुवर्णलाल बज्राचार्यले बताए।
बौद्ध विश्वविद्यालयको केन्द्रीय कार्यालय, लुम्बिनीमा हुन लागेको सम्मेलनमा पहिलो दिन उद्घाटन सत्रपछि मानव संसाधन व्यवस्थापनमा बौद्ध दर्शनको उपयोग, श्रमबजारमा कृत्रिम बौद्धिकता (एआई)को प्रयोग, उच्च शिक्षाका लागि क्षेत्रीय सहयोग र सञ्जाल निर्माण तथा मानव संसाधन व्यवस्थापनमा संस्थागत भूमिका विषयमा २४ वटा कार्यपत्र प्रस्तुत हुनेछन्। सम्मेलनमा ११ देशका अध्येताहरुले कार्यपत्र प्रस्तुत गर्ने कार्यक्रम तय भएको बज्राचार्यले बताए।
दोस्रो दिन उपकुलपति सम्मेलन हुनेछ। उपकुलपति सम्मेलनमा नेपाल, भारत, जापानका विश्वविद्यालयका उपकुलपतिहरूको सहभागिता रहनेछ। सम्मेलनमा विश्वविद्यालय अनुदान आयोगका अध्यक्ष, भारतको नालन्दा विश्वविद्यालय, सिद्धार्थ विश्वविद्यालय, नेपालका मध्यपश्चिम विश्वविद्यालय, पोखरा विश्वविद्यालय, पूर्वाञ्चल विश्वविद्यालय, राजर्षिजनक विश्वविद्यालय, नेपाल संस्कृत विश्वविद्यालयलगायतका उपकुलपतिको सहभागिता रहने छ। त्यस्तै राप्ती स्वास्थ्य विज्ञान प्रतिष्ठान, कर्णाली स्वास्थ्य विज्ञान प्रतिष्ठान, मदन भण्डारी स्वास्थ्य विज्ञान प्रतिष्ठानका उपकुलपतिको सहभागी हुने भएको छ।
सम्मेलनमा लुम्बिनी प्राविधिक विश्वविद्यालय, गण्डकी विश्वविद्यालय, मधेश विश्वविद्यालयका उपकुलपति तथा नेपाल संस्कृत विश्वविद्यालय र काठमाडौं विश्वविद्यालयका रजिस्ट्रारको समेत सहभागिता रहने जनाइएको छ। त्यस्तै सम्मेलनमा लुम्बिनी बौद्ध विश्वविद्यालयसहित अन्य विश्वविद्यालयका पूर्वउपकुलपतिको पनि सहभागिता हुने विश्वविद्यालयले जनाएको छ।
उपकुलपतिहरूको सम्मेलनमा हुने बौद्ध शिक्षाको विश्वव्यापीकरण तथा उच्च शिक्षाका चुनौती र अवसरका विषयमा हुने छलफलबाट प्राप्त निष्कर्षलाई लुम्बिनी घोषणापत्रका रूपमा सार्वजनिक गरिने लुम्बिनी बौद्ध विश्वविद्यालयका रजिस्ट्रार तिलकराम आचार्यले बताए। ‘उपकुलपति सम्मेलनमा एकैचरणमा तीन सत्रमा छलफल गर्ने गरी तालिका बनाइएको छ,’ उनले भने, ‘चौथो औद्योगिक क्रान्तिका लागि उच्च शिक्षा : वैश्विक गतिशीलता, बौद्ध ज्ञान, र शैक्षिक सहकार्य विषयको एक सत्र, नेपालमा उच्च शिक्षाका चुनौती र अवसर : वैश्विक गतिशीलता, बौद्ध ज्ञान, र शैक्षिक उत्कृष्टताको समावेश विषयमा अर्को सत्र र नेपालमा वैकल्पिक चिकित्सा प्रवर्द्धन : दिगो विकास लक्ष्यसंगको सहकार्य विषयमा तेस्रो सत्र हुनेछ।’
दुवै दिन बिहान ९ बजेदखि साँझ ५ बजेसम्म सम्मेलनका सत्र चल्ने अन्तर्राष्ट्रिय सम्बन्ध केन्द्रका संयोजक राजेन्द्र घिमिरेले बताए। उद्घाटन सत्रमा राष्ट्रिय योजना आयोगका उपाध्याक्ष प्रा.शिवराज अधिकारीसहित संघीय सरकार, प्रदेश सरकार तथा स्थानीय सरकारका प्रतिनिधि, व्यावसायिक संघ संस्थाका प्रतिनिधि, शैक्षिक संस्थाका प्रमुख, अध्येता, अनुसन्धानकर्ताको सहभागिता रहने लुम्बिनी बौद्ध विश्वविद्यालयले जनाएको छ। सम्मेलनमा नेपाल, कम्बोडिया, चीन, जर्मनी, भारत, जापान, लाओस्, म्यान्मार, श्रीलंका, थाइल्याण्ड र भियतनामका विज्ञ तथा अध्येताको सहभागिता रहने छ।