काठमाडाैँ - नेपाल शिक्षक महासंघ राष्ट्रिय समितिले काठमाडौँमा भोलि चैत्र २० गते बुधबार १ बजेबाट माइतीघर काठमाडौँमा शिक्षा ऐनका लागि अनिश्चितकालीन आन्दोलन गर्ने भएको छ।
स्थायी, राहत, साविक उमावि, सिकाइ अनुदान, वालविकास कक्षा, स्थायी करार, प्राविधिक धार, विशेष शिक्षा तथा संस्थागत विद्यालय लगायत सबै प्रकृतिका शिक्षक तथा विद्यालय कर्मचारीका सबै समस्या समाधान गरी गुणस्तरीय विद्यालय शिक्षाको प्रबन्धका पक्षमा स्पष्ट निर्माण गर्न सक्ने नयाँ विद्यालय शिक्षा ऐन जारी नभएसम्म यो आन्दोलन निरन्तर चलीरहने महासङ्घ जनाएकाे छ।
ने.शि.महासंघ र सरकारबीच विगतमा भएका सबै सहमती सम्बोधन हुने गरी गुणस्तरीय विद्यालय विद्यार्थी र शिक्षक-कर्मचारी मैत्री अग्रगामी विद्यालय शिक्षा ऐन जारी गराउन राज्यपक्षलाई बाध्य बनाउने आन्दोलनको उद्देश्य रहेकाे महासंघका अध्यक्ष लक्ष्मीकिशोर सुवेदी बताए।
सुवेदीले भने,' यो उद्देश्य प्राप्तिका लागि हामीले गर्ने आन्दोलन शान्तिपूर्ण, अनुशासित मर्यादित हुनेछ। यो आन्दोलन शिक्षक कर्मचारीको पेसागत मागमुद्दा सम्बोधनसंग मात्र जोडिएको छैन। गुणस्तरयुक्त विद्यालय शिक्षा तथा विद्यार्थीको हितका पक्षमा समेत आवाज समेटिएकाे छ।'
महासंघले आन्दोलनप्रति ऐक्यबद्धता, सहयोग र समर्थन दिन विद्यार्थी, अभिभावक र विद्यालय व्यवस्थापन समिति तथा सबै शैक्षिक सरोकार पक्षसमक्ष आग्रह गरेकाे छ। महासंघले यस अघि पालिका, जिल्ला प्रदेश तहमा आन्दोलनका कार्यक्रमहरु सफलताका साथ सम्पन्न गरिसकेकाे छ।
