काठमाडाैँ - नेपाल पुलिस स्कुल साँगाको परिसरमा नवनिर्मित छात्रावास भवनको उद्घाटन भएकाे छ। उक्त छात्रावासकाे उद्घाटन प्रहरी महानिरीक्षक बसन्तबहादुर कुँवरले गरेका हुन्। उनले नवनिर्मित भवनको निरीक्षण समेत गरे।
समारोहमा प्रहरी महानिरीक्षक कुँवरले नेपाल प्रहरीको पहिलो विद्यालयको रूपमा स्थापित यस विद्यालयले नेपाल प्रहरी तथा सर्वसाधारणका सन्ततिका लागि गुणस्तरीय शिक्षा प्रदान गरी शैक्षिक क्षेत्रको साथै विद्यार्थीहरूको चौतर्फी विकासमा निर्वाह गरेको भूमिका प्रशंसनीय रहेको बताए।
प्रहरी महानिरीक्षक कुँवरले विद्यालयले सुधारका लागि अंगिकार गर्ने रचनात्मक पहलहरू, विद्यालयलाई थप स्रोत तथा साधनहरूबाट सुसम्पन्न गराउने प्रयासहरू एवम् विद्यालयको क्षमता र सुविधा विस्तारसँगै समयानुकूल स्तरवृद्धि गर्ने सन्दर्भमा नेपाल प्रहरी प्रधान कार्यालय सदैव चिन्तनशील रहँदै आएको उल्लेख गरे।
नवनिर्मित भवनले अध्ययनरत छात्राहरूको रहनसहन तथा बसाईमा सहजता प्रदान गर्ने र व्यवस्थापकीय दृष्टिकोणबाट समेत स्कुलको शैक्षिक गतिविध अझ प्रभावकारी र व्यवस्थित हुने अपेक्षा रहेको उनले उल्लेख गरे । विद्यालयमा अध्ययनरत विद्यार्थीहरूलाई गुणस्तरीय शिक्षा प्रदान गरी सवल र सक्षम नागरिक बनाउने जिम्मेवारीमा खरो उत्रन विद्यालय व्यवस्थापन पक्षलाई उनले आग्रह गरे।
विद्यालय व्यवस्थापन समितिका अध्यक्ष प्रहरी अतिरिक्त महानिरीक्षक टेक प्रसाद राईले धन्यवाद मन्तव्य व्यक्त गर्नुभएको उक्त कार्यक्रममा बनेपा नगरपालिकाका प्रमुख शान्तिरत्न शाक्यले आफ्नो शुभकामना मन्तव्य तथा स्कूलका प्राचार्य मोहन पौडेलले स्वागत मन्तव्य व्यक्त गरेका थिए।
नेपाल पुलिस स्कुल साँगाको आन्तरिक स्रोतबाट कूल ६ करोड २५ लाख ८० हजार तीन सय ५४ रूपैयाँ ५८ पैसाको लागतमा उक्त भवन निर्माण सम्पन्न भएको हो।सो अवसरमा प्रहरी महानिरीक्षक कुँवरले भवन निर्माणमा विशेष योगदान पुर्याउने मानिसहरुलाइ प्रशंसापत्र प्रदान गरे।
समारोहमा प्रहरी अतिरिक्त महानिरीक्षकहरू, बनेपा नगरपालिकाका उपप्रमुख, काभ्रे जिल्लाका प्रमुख जिल्ला अधिकारी, प्रहरी नायब महानिरीक्षक, जिल्लास्थित सुरक्षा निकायका प्रमुख, विद्यालय व्यवस्थापन समितिका पदाधिकारी, स्थानीय तहका प्रतिनिधि, शिक्षक तथा विद्यार्थीहरू, सञ्चारकर्मी लगायतको उपस्थिति रहेको थियो।
