तलब भत्ताको माग गर्दै हनुमाननगर कंकालिनी नगरपालिकामा शिक्षक र कर्मचारीले लगाए ताला

शिक्षक

गृहपृष्ठ
शिक्षक

तलब भत्ताको माग गर्दै हनुमाननगर कंकालिनी नगरपालिकामा शिक्षक र कर्मचारीले लगाए ताला

ईडीयू सवाल सोमबार, कात्तिक २६, २०८१

काठमाडाैँ - तलब भत्ताको माग गर्दै सप्तरीको हनुमाननगर कंकालिनी नगरपालिका कार्यालयमा शिक्षक र कर्मचारीले अनिश्चितकालीन तालाबन्दी गरेका छन्। चालु आर्थिक वर्ष २०८१/८२ को साउनदेखि हालसम्म तलब भत्ता उपलब्ध नगराएको भन्दै आइतबार शिक्षक र कर्मचारीहरूले कार्यालयको मुख्य गेटमा तालाबन्दी गरेका हुन्। आइतबार उनीहरुले कार्यालय अगाडि धर्ना समेत दिएका छन्।

मेयर, उपमेयर, र प्रमुख प्रशासनिक अधिकृतसँग पटक-पटक मौखिक र लिखित रूपमा तलब भत्ताका लागि आग्रह गर्दा पनि सुनुवाइ नभएपछि बाध्य भएर तालाबन्दी गरेको आन्दोलन परिचालन समितिका संयोजक अशोक कुमार यादवले बताए।दशैँ,तिहार र छठ जस्ता प्रमुख पर्वहरूमा पनि तलब भत्ता नपाउँदा शिक्षक र कर्मचारीहरुलाई परिवार पाल्न समेत कठिन भएको उनको भनाइ छ।

शिक्षकहरूले गत कात्तिक ६ गते नगर प्रमुखलाई तलब भत्ताको मागसहित ज्ञापन बुझाउँदै ६ दिनको अल्टिमेटम दिएका थिए। तर, कुनै ध्यान नदिएपछि कात्तिक ११ गतेदेखि उनीहरु विद्यालय बन्द गरी धर्ना सुरु गरेका थिए।

धर्ना पनि बेवास्ता भएपछि तालाबन्दीमा जान बाध्य भएको शिक्षक र कर्मचारीहरुले बताएका छन्। यस नगरपालिकाको चालू आर्थिक वर्ष २०८१/८२ को नगरसभा हुन नसक्दा कुनै आर्थिक कारोबार हुन सकेको छैन।

प्रकाशित मिति: सोमबार, कात्तिक २६, २०८१ ११:५८