रावा क्याम्पसले महिला र दलित विद्यार्थीलाई ५० प्रतिशत छुट दिने

कलेज

गृहपृष्ठ
कलेज

रावा क्याम्पसले महिला र दलित विद्यार्थीलाई ५० प्रतिशत छुट दिने

ईडीयू सवाल आइतबार, कात्तिक २५, २०८१

काठमाडाैँ - रावाबेँसी गाउँपालिका-२ खार्पा स्थित रावा क्याम्पसले स्नातक तहमा अध्ययन गर्ने महिला र दलित विद्यार्थीलाई अध्ययन शुल्कमा ५० प्रतिशत छुट दिने भएको छ। क्याम्पस व्यवस्थापन समितिको निर्णयअनुसार कलेजले महिला र दलित विद्यार्थीलाई छुट दिने निर्णय गरेको हो।

क्याम्पसले चालु शैक्षिक सत्रदेखि उक्त निर्णय कार्यान्वयनमा ल्याएको क्याम्पस प्रमुख दीपक पोखरेलले जानकारी दिए। असोज २८ गतेको क्याम्पस सञ्चालक समितिको निर्णयले स्नातक तह शिक्षाशास्त्र संकायमा अध्ययनरत दलित र महिला विद्यार्थीलाई वार्षिक शुल्कमा ५० प्रतिशत छुट दिने निर्णय गरिएको हो। क्याम्पसले अन्य विद्यार्थीलाई पनि २५ प्रतिशत छुट दिने निर्णय गरेको छ।

‘अन्य विद्यार्थीलाई पनि २५ प्रतिशत छुटको व्यवस्था गरिएको छ। रावा क्याम्पसमा अध्ययनरत स्नातक तहका सबै विद्यार्थीले वर्षमा रु १० हजार शुल्क बुझाउनुपथ्र्यो। यस वर्षबाट महिला र दलित समुदायका विद्यार्थीले रु पाँच हजार र अन्य विद्यार्थीले रु सात हजार पाँच सय मात्र बुझाउनुपर्छ‘, पोखरेलले भने, ‘त्रिभुवन विश्वविद्यालयबाट सम्बन्धन प्राप्त रावा क्याम्पसमा शिक्षा शास्त्र सङ्कायमा स्नातक तहको पठनपाठन भइरहेको छ। क्याम्पस व्यवस्थापन समितिको यो निर्णयले विद्यार्थी उत्साहित भएका छन्।’

विसं २०६५ मा स्थापना भएको रावा क्याम्पसमा खोटाङसहित छिमेकी जिल्ला ओखलढुङ्गाका विद्यार्थी समेत अध्ययनरत छन्। क्याम्पसका लागि आवश्यक कक्षाकोठा र छात्राबासको भवन भारतीय दूतावासको आर्थिक सहयोगमा निर्माण गरिएको छ। शिक्षाशास्त्र विषयमा पठनपाठन भइरहेको रावा क्याम्पसमा पुस्तकालय, कम्प्युटर प्रयोगशालालगायत सुविधा रहेको पाइन्छ।

क्याम्पस सञ्चालक समितिको निर्णय