काठमाडौँ - पूर्वाञ्चल विश्वविद्यालय र सिएनआईबीच समझदारीपत्रमा हस्ताक्षर भएकाे छ।बुधबार पूर्वाञ्चल विश्वविद्यालयका उपकुलपति प्रा.डा बिजुकुमार थपलिया र नेपाल उद्योग परिसंघ (सिएनआई) का उपाध्यक्ष बिरेन्द्र पाण्डेले समझदारीपत्रमा हस्ताक्षर गरेका हुन्।
सिएनआई र पूर्वाञ्चल विश्वविद्यालयबीच इन्डस्ट्रि एकाडेमिया सम्बन्धलाई मजबुत बनाउन नलेज, स्किल र रिसोर्सेसको आदानप्रदान गर्ने, बजारको माग अनुसार जनशक्ति उत्पादन गर्ने, नयाँ प्रविधिको अध्ययन अनुसन्धान गर्ने, ज्ञान हस्तान्तरण तथा तालीमको लागि सहकार्य गर्ने, उद्योग परिसंघले भौतिक पूर्वाधारको लागि सहयोग गर्ने र विद्यार्थीको इन्टर्नसिप तथा अभ्यासगत तालिमको लागि व्यवस्थापन गरिदिने विषयमा दुई पक्षबीच सम्झाैता भएकाे हाे।
यो सम्झौता तत्काल देखि कार्यान्वयन हुने र कार्यान्वयन सहजीकरणका लागि पूर्वान्चल विश्वविद्यालय र नेपाल उद्योग परिसंघ आ–आफूले गर्नुपर्ने कामहरु छुट्याई टाइम फ्रेम समेत राखिएको छ।
पूर्वाञ्चल विश्वविद्यालयले पाठ्यक्रम निर्माण गर्दा औद्योगिक क्षेत्रलाई चाहिने जनशक्तिहरु उत्पादन गर्न सकियोस् भन्ने हेतुले कन्ष्ट्रक्सन सम्बन्धि, हाइड्रोपावर सम्बन्धी, मेनेजमेण्ट सम्बन्धि बिभिन्न बिज्ञहरु र निजी क्षेत्रको समेत सहभागिता गराई पाठ्यक्रम तयार गरिएकोले सोको लागि इन्जिनियरिङ तर्फ आठौं सेमेष्टरमा गरिनुपर्ने तीन महिनाको इण्टर्नसिप, त्यसैगरी इन्जिनियरिङ बाहेकका अन्य कार्यक्रमहरूमा गर्नैपर्ने इण्टर्नसिपको लागि पनि सहज हुनेछ।
करिब ३५० ठूला उद्योगहरू सदस्य रहेको नेपाल उद्योग परिसंघसँगको सम्झौताले पूर्वाञ्चल विश्वविद्यालयमा अध्ययनरत विद्यार्थीलाई सहज हुने नेपाल उद्योग परिसंघका उपाध्यक्ष बिरेन्द्र पाण्डेले बताए।
सैद्धान्तिक ज्ञानको लागि कलेजहरुमा पर्याप्त पठनपाठन हुने, प्रयोगशाला अभ्यास पनि हुने, फिल्ड भिजिट पनि हुने तर एउटा कुशल मेनेजर बन्नको लागि फिल्डमै गएर काम गर्दा मात्रै बन्न सक्ने भएकोले पाठ्यक्रममा रहेको इन्टर्नसिपको व्यवस्था कार्यान्वयनको लागि हामीले सम्झौता गरेका हौँ, पूर्वान्चल विश्वविद्यालयका उपकुलपति बिजुकुमार थपलियाले स्पष्ट पारे।
विश्वविद्यालयले जनशक्ति उत्पादन गरिरहेको छ, निजी क्षेत्रले आफूले चाहेजस्तो जनशक्ति नपाएको कारण त्यस्ता जनशक्ति पाउनको लागि करोडौँ रुपैँया बिदेश पठाउनु परिरहेको छ, यो ग्याप परिपूर्तिको लागि यो सम्झौता कोसेढुंगा साबित हुने देखिन्छ।
इण्टर्नसिप गर्दागर्दै कतिपय विद्यार्थीलाई रोजगार समेत मिल्न सक्ने देखिन्छ। यसबाट कामसँगै पढाइको अवधारणामा पनि मद्वत हुने देखिन्छ।
यो समझदारी पत्रमा हस्ताक्षर गर्ने कार्यक्रममा पूविविका रजिष्ट्रार नीलमणि पोख्रेल, अनुगमन विभाग प्रमुख प्रा. उत्तम रेग्मी, पियुक्यानका अध्यक्ष सुधिर गुरागाई, महासचिव सुरेश केसी हिलसाइड कलेज अफ इन्जिनियरिङका प्रबन्ध संचालक गोपीकृष्ण न्यौपाने लगायतका शिक्षाविद्वहरूको उपस्थिति रहेको थियो।
