प्रधानमन्त्री ओलीले भने, 'शिक्षक जागिर मात्र होइन एक प्रकारको जागरण पनि हो'

शिक्षक

गृहपृष्ठ
शिक्षक

प्रधानमन्त्री ओलीले भने, 'शिक्षक जागिर मात्र होइन एक प्रकारको जागरण पनि हो'

ईडीयू सवाल आइतबार, भदौ २, २०८१

काठमाडौँ - प्रधानमन्त्री केपी शर्मा ओलीले शिक्षकका समस्या आपसी संवादबाट समाधान गर्नुपर्ने बताएका छन्।

नेपाल राष्ट्रिय शिक्षक सङ्गठनको २३औँ राष्ट्रिय परिषद् बैठकमा उनले पढाउने दायित्वसँगै नेपालको राजनीतिक परिवर्तनमा पनि शिक्षकहरूले महत्त्वपूर्ण भूमिका निर्वाह गरेको बताए।

'शिक्षकका समस्या भए आपसी संवादबाट समाधान गर्नुपर्छ,'प्रधानमन्त्री ओलीले भने, 'शिक्षक वा कुनै पनि जनतामाथि सरकारले दमनचक्र लाद्न हुँदैन।'

अघिल्लो सरकारले शिक्षकलाई राजनीति गरेको आरोप लगाएर दबाबमा राखेको उल्लेख गर्दै प्रधानमन्त्री ओलीले अब अवस्था फेरिएकाले ढुक्कका साथ शिक्षण र समाजको जागरणमा लाग्न आग्रह गरे। उनले शिक्षासम्बन्धी र कर्मचारीसम्बन्धी ऐन नियमलाई आपसी संवादबाट समायानुकल सुधारका लागि सरकार तत्पर रहेको जनाए।

'राजनीति र शिक्षकको भूमिकालाई नबुुझेकाले शिक्षकमाथि एकतर्फी दमनचक्र लगाउन खोजेका थिए। शिक्षकलाई राजनीतिबाट अलग गराएँ भनेर घोषणा गरेका थिए। त्यो शिक्षकहरूलाई लपेट्ने प्रयास हो। ती प्रयास गलत थिए', प्रधानमन्त्री एवं नेपाल कम्युनिस्ट पार्टी (एमाले) का अध्यक्ष ओलीले भने “वास्तवमा अरस्तु र प्लेटोका पालादेखि नै मानिस राजनीतिक प्राणी हो भन्ने स्पष्ट भइसकेको थियो। त्यसैले यो सरकार शिक्षकमाथि कुनै शत्रुता राख्नुपर्ने कारण देख्दैन।’’

प्रधानमन्त्री ओलीले शिक्षकले आफ्नो कर्म र दायित्वलाई इमान्दार रुपमा निर्वाह गरिदिए पुग्ने कुरा बताए। 'कक्षाकोठाभन्दा बाहिर पनि शिक्षक समाजको विकृति बढार्ने काममा साँझ-बिहान लाग्नुपर्छ। शिक्षक हुनु भनेको जागिरे हुनु होइन, एक प्रकारको जागरण हो', प्रधानमन्त्रीले भने।

प्रकाशित मिति: आइतबार, भदौ २, २०८१ १२:२७