तनहुँ - डेंगुसंक्रमणको बिरामी बढेपछि नियन्त्रणको प्रयास स्वरूप आँबुखैरेनीका गाउँपालिकाका चार विद्यालयहरू बन्द गरिएको छ। आँबुखैरेनी बजार र आसपासका क्षेत्रमा डेङ्गुका बिरामी बढ्दै गएकाले विद्यालय बन्द गरिएको आँबुखैरेनी गाउँपालिकाका स्वास्थ्य शाखाका प्रमुख अगमराज उपाध्यायले जानकारी दिएका छन्।
उपाध्यायका अनुसार वडा नम्बर ३ मा रहेका रामशाह माध्यमिक विद्यालय, मर्स्याङ्दी बालज्योती अङ्ग्रेजी बोडिङ स्कुल, बाल शिक्षा सदन बोर्डिङ स्कुल र नवबुद्ध अङ्ग्रेजी बोर्डिङ स्कुल अर्को सूचना नभए सम्मको लागि बन्द गरिएको हो।
आँबुखैरेनीमा मात्रै करिब ४५० जनामासंक्रमण भएकोले लामखुट्टेले फुल पार्ने ठाउँमा 'खोजौँ र नष्ट गरौँ' भन्ने नारा सहित टोलटोल, बस्ती बस्तीमा अभियान सञ्चालन गरिएको उपाध्यायले जानकारी दिए।
डेंगुकोसंक्रमण एडिज जातीको लामखुट्टेबाट मात्र फैलने, सफा पानीमा फूल पार्ने, लार्भा हुर्काउने भएकाले पानी जम्न नदिएर वासस्थान ध्वस्त बनाएर लामखुट्टेलाई नष्ट गर्नुपर्ने चिकित्सक बताउँछन्। बेस्सरी टाउको दुख्नु, आँखाको गेडी दुख्नु, शरीरमा डाबर आउनु, अरुचि हुनु, जोर्नी तथा मांसपेशी बेस्सरी दुख्नु, पेट तथा आन्द्रामा गडबडी हुनु पनि डेङ्गुको लक्षण भएको उपाध्याय बताउछन्।
बिरामीको सङ्ख्यामा वृद्धि भएको अवस्थामा विद्यालय बन्द गर्न र रोकथाम तथा नियन्त्रणका सम्बन्धमा पूर्व तयारी विशेष सतर्कता अपनाउन आग्रह गरिएको आँबुखैरेनी गाउँपालिकाका शिक्षा शाखा प्रमुख निर्मला कुँवरले जानकारी दिइन्। उपचारमा समस्या भएमा स्वास्थ्य बिमा नभएका विद्यार्थीहरूलाई आँबुखैरेनी अस्पतालमा निःशुल्क उपचारको व्यवस्था गरिएको कुँवरले जानकारी गराइन्।
