काठमाडौँ- ‘सपना भुलाइ सारा’ गीत जस्ता अमर गीत दिएका गायक योगेश वैद्य अब सम्झनामा मात्र छन्। किनकि, हिजो (शनिबार) बिहानै उनले संसार छाडे।
शिव अधिकारीको शब्द र नातिकाजीको संगीत रहेको उक्त गीत उनको कालजयी विसं २०४२ मा रेकर्ड भएको थियो।
संगीतकर्मीले उनलाई अन्तिम श्रद्धाञ्जलि दिँदै ‘सपना भुलाइ सारा’ गीत गाउँदै बिदाइ गरे। उनको बिदाइमा उपस्थित अधिकांशका आँखा रसाएका थिए। कालजयी गीत गाएका गायक वैद्यको बिदाइ कसैका लागि सहज थिएन।
उनी गायकसँगै कवि पनि थिए। वैद्यको निधनले सांगीतिक र साहित्य क्षेत्रमा अपूरणनीय क्षति पुगेको श्रद्धाञ्जलि दिनेको भनाइ थियो।
बाल्यकालमा आमाबाट नेवारी भाषाको सरस्वती बन्दना सुन्दै हुर्किएका गायक वैद्य त्यही समयमा गीतसंगीतप्रति आकर्षित भए। त्यसपछि बुबाले एक दिन घरमा रेडियो ल्याएका उनको संगीतसँगको नाता झनै झाँगियो।
उक्त रेडियोमा उनले नेपालीसँगै हिन्दी गीतहरूलाई सुन्ने र बुझ्ने मौका पाए। उनले रेडियो नेपालमा दिएको एक अन्तर्वार्तामा रेडियोलाई साथीका रुपमा चित्रण गरेका थिए।
विसं २०१४ मा चीनका प्रधानमन्त्री चाउ एन लाइ नेपाल भ्रमणमा आएका बेला शान्ति निकुञ्ज सहविद्यालय पुगेका थिए। त्यहाँ आयोजित सांस्कृतिक कार्यक्रममा गायक वैद्यले गीत गाए।
विभिन्न सांगीतिक कार्यक्रममा सहभागी हुँदै गीतसङ्गीतसँग नजिकिँदै गएका गायक वैद्यले रेडियो नेपालमा किरण खरेलको शब्द र नातिकाजीको संगीतमा पहिलो गीत ‘कति प्यासी छ जिन्दगी...’ रेकर्ड गरेका थिए।
उनलाई चिनाउने गीत ‘सपना भुलाइ सारा’ बनेको गायक तथा संगीतकार टीका भण्डारीले बताए। वैद्यले आफूलाई सुहाउने भन्दै संगीतकार नातिकाजीसँग उक्त गीत मागेको उनले जानकारी दिए।
गायक तथा संगीतकार शम्भुजित बाँस्कोटाले गायक वैद्य मखमली आवाजका धनी रहेको बताए। 'उहाँसँगको सामीप्यतालाई भन्ने शब्द छैन । तीन दिनअगाडि मात्र कुराकानी भएको थियो। उनले मेरो संगीतमा पाश्र्व गायन पनि गर्नुभएको छ', उनले भने, 'वैद्यले सधैँ भारतीय गायकजस्तो नेपाली गायकगायिका बन्नुपर्नेमा जोड दिने गर्नुहुन्थ्यो । उहाँ सुगम संगीतका लागि संरक्षक हुनुहुन्थ्यो । उहाँले समय–समयमा दिएका अभिव्यक्ति, गाउनुभएका गीत, गीतसंगीत गर्ने तरिका सबै गहन हुन्थ्यो । उहाँ अत्यन्तै गहन व्यक्तित्व हुनुहुन्थ्यो।' संगीतकार बाँस्कोटाले गायक वैद्यको विदाइ सहज नभएको प्रतिक्रिया दिँदै उहाँले छाडेर जानुभएका गीतसंगीत र कृतिहरु रहिरहने बताए।
उनको आवाजको प्रभावमा आफूलाई काठमाडौँसम्म ल्याएको संगीतकार तथा गायक चेतन सापकोटाले बताए।
'उहाँको आवाजको जादुले कलामा लाग्न प्रेरित गर्ने धेरै युवा छन्। उहाँको गीतसङ्गीतलाई मैले शब्दमा व्यक्त गर्न सक्दिनँ। उहाँलगायत अग्रज सर्जकको आवाजले रेडियो नेपाललाई थप उचाइमा पु¥याएको भन्छु म', उनले भने, 'म वैद्यको आवाजले सङ्गीतमा भविष्य खोज्दै एघार वर्षको उमेरमा सिन्धुपाल्चोकदेखि काठमाडौँ आएको थिएँ । त्यो समयमा सोचविचार केही थिएन । योगेश दाइ झैँ उक्त समयका अन्य गायकको आवाजमा आफ्नो आवाज राख्दै गीतसंगीत सुरु गरेको हुँ।'
नयाँ पुस्ताका उदीयमान गायक कर्णराज गिरीले उनको गीत महोत्सवमा गएको स्मरण गरे। 'उहाँसँग मेरो प्रत्यक्ष भेटघाट कमै रह्यो।
त्यस्तो धेरै नजिक पनि होइन तर उहाँको गीतले हामी जस्तालाई गायक बन्ने सपना देखाउनाका साथै चिनाएको पनि छ', उनले भने, 'आफ्नै परिचय नहुँदा उहाँकै गीत गाएर मेला महोत्सवमा परिचय बनाएको हुँ। उहाँको गायन प्रभावले मलाई गायनमा लाग्न प्रत्यक्ष रुपमा सहयोग गरेको छ।'
राष्ट्रिय गीत सम्मेलनमा प्रथम तथा छिन्नलता गीत पुरस्कार, विख्यात त्रिशक्तिपट्ट प्राप्त गरेका साहित्यकार वैद्यका विभिन्न कृति प्रकाशित छन्। उनको गीति कवितासङ्ग्रह ‘समय प्रवाहमा छुटेका पलहरू’ प्रकाशित छ।
विसं २००३ असार २४ गते काठमाडौँको नरदेवीमा जन्मिनुभएका गायक वैद्यको श्रीमती, दुई छोरी र एक छोरा छन्।
करिब पाँच सय नेपाली गीत तथा झन्डै एक सयभन्दा बढी नेपाल भाषाका गीतमा स्वर दिएका वैद्य पछिल्लो समय पक्षघातसम्बन्धी समस्या झेलिरहेका थिए। गायक वैद्यको केही समयअघि मिर्गौला प्रत्यारोपण गरिएकामा केही दिनदेखि रुघाखोकीबाट ग्रसित थिए।
७७ वर्षको उमेरमा सुन्धारास्थित काठमाडौँ भ्याली अस्पतालमा उपचारका क्रममा उनको निधन भएको थियो। उनको ‘नेपाल मेरो तिमीलाई’, ‘चोट दिलमै रातदिन’, ‘आँखैमा रात’, ‘यो लामो जीवनमा किन म हतासहतास छु’ लगायत गीत कालजयी छन्।
